السلام عليكم جميعا .. أعتذر عن طول الغياب .. وما لي من عذر !

..


كنا نسولف بالدوام عن هالموضوع .. كل واحد كان يتذكر تجربته بأول تعيينه كمعلم وشلون كانت التجربة مع أول فصل قام بتدريسه .. حبيت أنقل الموضوع هني

بالنسبة لي .. وكخريج كلية الآداب ولا عطوني لا دورة ولا شي ... تعينت بالتدريس سنة 1996 .. وعلى طول عطوني 3 مقررات 15 ساعة بالأسبوع .. مقرر 10 تاريخ الكويت صفين ومقرر 87 مبادئ الفلسفة

رئيس القسم وقتها الله يجزاه خير لمه عرف إني على الزيرووو وأول مرة أدش صف وأدرس .. تركني أول أسبوعين أدش مع الزملاء بالحصص وأتعلم منهم .. وهم ما قصر شرحلي أساسيات التدريس والتعامل مع الطلبة

كان أول فصل أدش عليهم بروحي وأعطي حصة كاملة حق مقرر 87 فلسفة .. الطلبة كبار وأطول مني

طبعا أول مشكلة واجهتني اهي ضبط الوقت .. خلصت الدرس أول ربع ساعة وبعدين ما عرفت شقول هههههههه وتعرفون الطلبة .. منو عنده سؤال ؟ محد ولا واحد عنده سؤال .. فاهمين كل شي ؟ اي فاهمين .. ووقت الامتحان يالله يكتبون أساميهم

المهم .. خلصت الحصة على خير .. طلعت من الصف والا يلحقني واحد من الطلبة .. قديييم وكبيير
تخيلوا شنو يبي !
الأخ موظف بالداخلية وعنده يومين بالأسبوع دوام صبح يتأخر .. ويبيني ما أسجله غياب

قلت له انت شلون موظف ؟ تو الناس خلص ثانوية ولاحق على الوظيفة
جان يقول لي آنا متزوج هههههههه قلت بعد .. الله يعينك عيل

المهم .. لمه دشيت ثاني حصة على طلاب مقرر 10 كان الوضع أهون .. خاصة إني توني طالع من طلاب مقرر 87 الكبار

يمكن استمرت معاي الرهبة والارتباك وعدم القدرة على ضبط الوقت أسبوعين أو أكثر .. خاصة مع طلبة الفلسفة لأنهم خريجين وكبار ومشاكلهم كانت كبيرة

لكن الحمد لله .. الله وفقني ومشى الحال ..

من المواقف اللي أذكرها وياهم .. طبعا غير سوالف الكتابة على الطوفة .. خاصة رسمة الدقمة اللي يكتبون عليها " اضغط الزر يختفي المدرس " ههههههه

كان 90 % من الطلبة يدخنون .. ولما كنت أروح للصف وأفتح الباب أصيدهم يدخنون .. أسحبهم للإدارة .. فكنت كل أسبوع تقريبا ألقى سيارتي مشخطة والا مبنجرين ت****ن ( ولازم ت****ن علشان أتبهدل عدل

الغريب ان كان عندي 15 حصة بالأسبوع .. ومراقبة يومية حصة .. وكنت مرشد ( نظام المقررات ) .. ورئيس القسم كان مسوي لجان بالقسم ومعطيني لجنة الاختبارات فكان طباعة كل الاختبارات لكل الزملاء المعلمين آنا أطبعها .. تدرون معلم جديد والوحيد اللي كنت أعرف للكمبيوتر
وهم كان مكلفني بلجنة الوسائل التعليمية بالقسم وهذي تبهدلت فيها عدل لأني قعدت أجمع كل الخرايط والأفلام التعليمية والمجسمات وغيرها وأسويلهم فهرس بكل تفاصيلهم ونموذج استعارة للأقسام الثانية ومدري شنو ..

المهم كان اليوم الدراسي والله العظيم شغل وكراف من أول دقيقة لي آخر دقيقة .. هذا غير شغل الارشاد اللي نقعد فيه ساعتين عقب الدوام أو نضطر نرجع للمدرسة بالليل علشان نخلصه ..

ومع هذا كنت بقمة السعادة .. وإذا غاب أحد من الزملاء أستانس إني آخذ حصته أو أراقب بداله .. الشكوى كانت قليلة .. وكان عندنا حرية كبيرة بالتصرف بالمنهج ووضع الاختبارات

ما أدري ليش هالحين عسى ما تقول حق معلم جديد شي أو تطلب منه طلب صغير إلا قب بويهك وقال شمعنه آنا !!!


أتمنى باجي الأعضاء يحطون تجاربهم مع بداية تعيينهم وأول صفوف درسوها

ورد وود للجميع ...