سؤال لكل مديرة روضه ومسؤوله عن الميزانية
السلام عليكم ورحمة الله وبركاته
اشلونكم وشخباركم؟
اتمنى ان هالسنه تكون سنة خير علينا وعليكم وعساكم دايم مرتاحين .
حبيباتي من زماااان وانا تقرقع بقلبي سالفة ميزانية الروضه لأن فرق كبيييييييييييييييييييييييييير بين روضه وروضه يعني راح اقول لكم تجربتي اللي صار لها 9 سنوات برياض الاطفال تنقلت خلالها في اكثر من روضه بمحافظة الفراونيه.
ما عمري شفت خلالها دينار واحد من ميزانية الروضه ينصرف لا على صفي ولا اغراضي
ما عمرها ادارة من الادارات اللي شفتهم وهم تقريبا 5 إدارات سألتني شنو ناقصج يا أبله وشنو محتاجه لصفج وولا حتى شرتي لي دفتر تحضير او سجل مهارات للصف
في حين ان الرياض الثانيه ينصرف عليهم من الميزانيه لا وبعد يعطون كل معلمه مبلغ كل كورس بحدود 30 او 50 دينار وكل شهر 10 دنانير ويشترون لهم سجل المهارات ودفتر التحضير وحتى الصدريات هذا غير الالوان مالت الاصابع والالوان الشينيه والورق والصمغ والمقص والدباسات والذي منه ...الخ!
بالله بعرف هل احنا دوله داخل دوله ؟
بروضتي الحاليه كل شي من جيب المعلمات من صبغ الممرات والفصول والنجارين وضيافه وحتى بحفلات التخرج تجبر المعلمات عالمبادرات ويحطون لها من جيبهم مدرجات وكراسي وفلوس الجمعيه اللي حق الماجله ما نشوف شي منها وكله يروووح لبيتها حتى وقت التخضير استغفر الله تطرش الشتلات حق بيتها طبعا هذا غير الوجبات مالت الاطفال الحمدلله والشكر حشى جنها طاقها الفقر ودايم عذر الناظره ان هذا يحسب لج تعاون يا أبله؟؟؟
طبعا ما انسى اجبارها للمعلمات على بيع الصور بدينار على الاهالي وتجبر المعلمه اللي تستلم الصور انها تدفع من جيبها الخاص وعقب تحاسب المعلمه الاهالي!!بالله احنا معلمات ولا بياعات صور؟؟
المفروض الوزارة تمنع هالطريقه اللي تتبعها المديرات للمتاجره يعني قيمة الصوره ما تتعدى ربع دينار وبطنها 750 فلس هذا غير حق حفلات التخرج تاخذ 5 من الاهالي وتسوي لهم درع من كرتون ومعاه صوره ما يتعدى قيمته دينار ونص والباقي في بطنها !!!
بحدود 6000 دينار قاعده ترووووح ما ادري وين؟؟؟
الادهى ان في صمت غريب من قبل الوكيله والمراقبه وهذا يدل ان في تقسيم للتركه حسبي الله ونعم الوكيل!
الغلط وكل الغلط ان النشرات ما يقدرون المعلمات يطلعون عليها بخصوص أوجه الصرف لميزانية الروضه وشنو عليهم وشنو لهم وايضا ان اللي تشتكي وتتكلم تروح فيها لأن ادارة المنطقة التعليمية ضد المعلمه ومع الادارة!!
يا ريت لو الاخت شمس تفيدنا بالنشرات اللي توقف هالاشكال عند حدها وجزاها الله كل خير.
