الكادر من حقنا ونستاهله اكثر من غيرنا ؟

[اريام]

الي وزير التربية ؟ لماذا تساومنا علي حق من حقوقنا ؟ الكادر من حقنا نطالب فيه خليتوا المدرس ما يسوي شي !خليتونا مثل المساكين صارت مهنة التدريس احقر مهنة من كثر ما ساومتوا عليها الحين كل المهن في الدولة تزيد مرتباتهم بدأ من نواب مجلس الامه والمهندسين والعسكرييين اللي طول النهار نايمين (اهم شي يسوونه ياخذوون سليب باق معاهم للدوام ) واحنا اللي نكرف طول النهار من اول الدوام سبع ونص ( ترا المناوبة تبدأ من سبع ) وحصص تدريس واقفين علي رجولنا نشرح ونصحح دفاتر وكتب و أوراق عمل بالهبل غير الاشراف والمناوبة وقت الفرص لا ومطالبين نسوي وسائل وامتحانات واوراق ضعاف وملفات ونسب وفئات طبعا ما عندي وقت احضر أخذ شغلي البيت احضر بالدفتر التحضير اليومي واحضر وسائلي الي آخرة من الشغل اللي ما ينتهي ما عندي وقت لعيالي أشوفهم ولا ادرسهم ادرس عيال الناس وانسي عيالي لا وبعد هذا كله يصيروون العسكريين( اللي اغلبهم ما عندهم شهادات احسن منا تزيدونهم مرتباتهم !!!! واخرتها تساومونا ما فيه كادر فيه نظام البونس ابو ثمانية الاف ترا محد بياخذة استحاله ان المدرس ما يغيب طول السنة ولا يتاخر ( تمنعنا لا نمرض تمنعنا ما نرتاح الناس ظروف واذا مرض واحد من عيالي شنو تبيني اسوي اقطه اخليه يموت عشان خاطر عيال الناس وبعدين شنو لازم تكون نسبة نجاح الطلبة 100٪ وين قاعدين زين اذا الله بلاني بطلبة نقول يعني اغبياء او ما يدرسون شنو تبيني اسوي فيهم اتعب عليهم وذا ما جابوا درجات سنعه انظلم وشغلي وتعبي يروح !!! ترا فيه فروق فردية يا حضرة الوزير في طلبة مستوي ذكائهم متدني عمر مستوي الطلبة ماكان دليل علي أدااء المعلم . وأبي اعلق علي كلمتك لما قلت وهل يستوي الذين يعملون باللذين لايعملون ابي اقولك شي انتم خليتوا الذين لا يعملون (العسكريين وغيرهم )احسن من الذين يعملوون ( المدرسين ) إحنا نبي مهنة التدريس مهنة شاقه ومعاشنا ما ينقص وبعد السنين هذي كلها ما تعطونا نهاية خدمه مثل العسكريين ليش إحنا كل يوم نجاهد وندرس عيالكم ونتحمل قلة أدب البعض منهم ونبي علاج في الخارج مثل العسكريين أكيد لما اخلص من التدريس بتصيير فيني امراض الدنيا وابي اتعالج حالي حال غيري . يا وزير التربية خلك في صف المعلم والبونس ابو ثمان الاف هذا شروطه تعجيزية صعب احد يحقق هذي الشروط وأقولك الكادر من حقنا وانتم قاعدين تساومونا علي مية وميتين وغيرنا مرتباتهم دبل مرتباتنا أتمني انهم يزيدون المرتب الاساسي للمدرس ابو 360 دينار ولما يتقاعد المدرس ما يقصون منه خليتوني اكرة اصيير مدرسة علي فكرة أمي ذاك اليوم تقول عطيني من معاشج صار ألفين قلت يمه ما ورأ وزارة التربية ألفين ما وراها الا الفلس وانتي تصدقين الإشاعات.خليهم يزيدونا يوصل 1200 وايد عليج يا وزارة التربية يا وزارة ذلت المدرس خليتونا نشوف العالم ونتحسر علي حالنا*

[مطيري]

والله ياكلامج يا أرياام يعور القلب وعسى الله يعوضنا ولايخيب تعبناا

وعسى هالكلمات مثل ماطلعت من قلبج تطلع توصل لقلب بو أنس وينصفنا بعد الله سبحانه

وبهالمناسبه نشحذ الهمم والجهود للتواجد غدا في مجلس الأمه وللضغط على النوااب في إدراج الكادر في جدول الأعمال وإقراره بحيث يصبح قراره نافذ بأغلبيه المجلس

وانشاءالله مايحوصون الأعضاء لانه باجر يبين منو مع الكادر ومنو ضده بمهما كانت الأسباب

[ام احمد65]

لنا ماراح اتناقش على سلبيات نظام البونص ولكن احب اقول ان البونص راح ياخذونه المقربون للناظر بالنسبة للغياب في معلمين ومعلمات مايداومون وهم واثقين من وجود من يوقع لهم الحضور ، بالنسبة للحصص مالمشكلة اذااخذ المعلم النصاب كامل ولكنه لا يدرس ولا يتعب نفسه في توصيل المعلومة الصحيحة للطالب ، بالنسبة للاحتياط احب اقول هناك فئة لا تاخذ الاحتياط ابدا وفئة المغضوب عليهم هم من ياخذوه ، ومالا افهمه هل يحاول ابو انس يخلينا تحت رحمة النظار وهو ما نحن عليه الان ولكن الفرق مافي بونس فنتحسب عليهم اذا لم ناخذ النسب اللي من حقنا ،هذا غير الحقد والكراهية التي سوف تولد بين المعلمين والمعلمات ، ستكون مهنة التعليم مهنة طاردة وليست جالبة فنرجو الغاء مبدا البونص الذي بدوره سوف يسبب ظلم كبير للمعلمين

[وطن]

بسم الله الرحمن الرحيم . كلامج كله عدل والله يعطيج العافيه . انا عندي مداخله بوضوع البونص يعني كل وزارات الدوله ماطبقو عليهم هالنظام ليش المعلمين بالذات اوكي تبون بونص ياوزارة التربيه وافقو على كادر المعلمين اللي انا اشوفه يمشي الحال وحطو بونص غير الكادر وشكراااا