يااااااااااه ظلم وتعسف

[غلا الرشايدة]

السلام عليكم

اشلونكم وشخباركم؟


بسولف عن معاناة مدرسات العربي

هذا جدولنا : والله يعين .......................
تحضيرين يوميا
اشراف
مربية
مناوبه
احتياط
نسوي اجتماعات
وفوق هذا نشاط اسبوعي
ومسابقات الزامية
احس اننا اصلا مظلومين ولازم جمعية المعلمين تتحرك والا اقدم استقالتي

[التويمي]

الله يكون بعونكم

بعيدا عن جمعية المعلمين .. لان ما وراهم الا الشعارات ...

[كلي وفا]

وعليكم السلااام

والله اشووووف الحاال من بعضه

ماقول الا الله يكوون في عووووناااا

[قيثارة]

وعليكم السلام ورحمة الله وبركاته..
هلا بغلا الرشااااايدة..
حبيبتي هذا هو الحال مع معلمات مادة اللغة العربية ومعلمات جميييييييييييع المواد..
بس انت شدي حيلك ولاتتأففين من الشغل...قدها ياغلا عبس...وشيلي من بالك موضوع الاستقالة..
لأن اذا الجمعية اسمعوا بتهديدك ماراح ينامون الليل !!!!
كل التوفيق ياغلاي

[التوأم]

غلااااااااااي
الله يعينك
قيثاره
ليش اسلوب رئاسة القسم علينا
كل الشكر

[قيثارة]

غلااااااااااي
الله يعينك
قيثاره
ليش اسلوب رئاسة القسم علينا
كل الشكر

هههههههههههههههههه هلا وغلا بالتوأم..
عااادي تحملوني سنة أولى رئاسة قسم:(194): ..

[super star]

اكثر وحده تكرف بالمدرسه

مدرسة اللغه العربيه

[المسك]

صح ..

بس انتي تكلمي لاتسكتين

والله اول ماتوظفنا كان نصابنا 22 حصه

الحين اشوه شوي ..

تحملي واحتسبي الاجر لرب العالمين

او انتقلي لمدرسه صغيره ..وضبطي امورج مع رئيسه القسم

خاصه اذا كانت حبيبه اكسبيها ..

السنين تمر بسرعه ..

وتحملي وكل شى له اجره ياعمري

تحملي وانا اختج ...

[غلا الرشايدة]

والله يا خواتي اني اكرف واتعب وعطوني الاذاعة العام ومااغيب وفوق هذا ما عطوني امتياز عطوني 86

اشرايكم ؟؟؟؟؟؟؟؟؟؟

[المسك]

لامايجوز

حرام عليها ناظرتج ..

الظاهر انتي مو النوع اللي يقلقس عندها ويتلصق

تسوين شغلج كامل وتمشين لبيتج

ماعرفتي للحريم ياقلبي قلبج انتي

بس حرام عليها 86

كل هالشغل عليج

وليش ماكلمتيها وكلمتي مشرفتج

التربيه اللي يستحي فيها يضيع حقه

اساليني انا

اول سنين تعيني كان نصابي 20 حصه

ومربيه صف

ومناوبه

ومرات يخلون مناوبتي الصبح اداوم من الساعه 6ونص عشان الحق على مناوبه الصبح < كانت مقصه

وكنت اسوي كل اللي تبيه الوكيله


واكثر وحده تناديني انا كانت تقص علي بالكلام الحلو تقولي انا احب اصبح بوجهج

وتعطيني احتياط بنت الحلال واستحي مااردها على بنه مره كبيره

لمن انتبهت طالعت الملسونه محد يكلمها

واللي تغيب يريحونها صف واحد

بس عطوني امتياز والله

اما الحين عقب الزواج والجهال خربت


ومالي عين اطالب بالامتياز مع اني ماسكه صفين

وماريحوني مع اني قديمه

وماصرت نفس اول

الحق ينقال

بس ماصرت اسكت نفس اول

اي شى يغثني اتكلم ..

وماعليج اللي يظلم له رب العالمين مايخليه

والله يوفقج ويرزقج من اوسع ابوابه يارب يارحيم

[همس الرووح]

يعطيك العافية ع طرح معاناتج
ترى كلنا في الهوا سوا
بارك الله فيك
دمت بألف خير
÷÷÷÷÷

[رياضى]

ما دام ساكتين عن ظلم وزارة التربية تحملو ما يجيكم ولاااااااااااااا تشكون ............. لأن إحنا المعلمين والمعلمات الى وصلنا حالنا لهالمواصيل
ودمتم بألف خير....................

[أسماء30382]

السلام عليكم

انا اعطيج حل عملي

أولا : الله يعطيج الف عافية
ثانيا : انتى ما شكيتى الى حق اخوان وأخوات المهنة والكفاح
ثالثا: هذا حال المدرس في دولة الكويت مهنة اعزها الله وذلتها وزارة التربية
رابعا: مع احترامي حق كل الاخوات الى داوموا ونصابهم 20 و الله يعطيهم الف عافية وادري اتعبوا لكن حال الوزارة اليوم
الله لا يبارك في النشاط والقيم الى دخلوها علينا احنا ندرس وله انسوي قيم

فتحت ذاك اليوم ملفي
لا زم عشان تقدير الكفاءة:
ندوات - بروشورات - معارض - ورش - حفلاات

آخر شي التعليم

قبل المعلم قلم والدوام لى 12 وربع و كان في قمة العطاء التربوي الحين دق ورقص و مو ملحقين

اعطيج الحل .

أولا : استعيني بالصبر والصلاة ولا تتركين الاستغفار اجعلى مناوبتك وعملك كله لهج بالاستغفار والله حاسة فيج والله انا مريت بالى انتي مريتي فيه و تعبت لكن الاستغفار يخفف علييج

ثانيا : اول ما تقعدين الصبح احمدي الله انه عندج وظيفة احفظت كرامتج من السؤال عند الناس ادري بتقولين هذي الوظيفة تهين الواحد والله الله يعز كل انسان مخلص ولو بعد حين بس الصبر

ثالثا: لا تحسين نهاية العالم وانتى اتسوين الشغل فهناك وظايف فيها مشقة وتعب مثل التمريض فهم ترة مثلنا يدخلون 6 و نصف الصبح

رابعا : نسقي مع زميلاتج في القسم و قسموا الشغل بينكم و خلى شعورج انه هذه متعة ففى لحظات العمل اجعليها تأمل و تفكر وعبادة

خامسا : اعلمي انك قضيتي عمرك في وظيفة لك الاجر عليها ولم تقضيها بالانترنت و لا اسواق ولا حش ولا كلام فاضي في ناس عايشة جذي وآخر الشهر تستلم معاش وانتى مو منهم

سادسا : والله والله ادري انه والوضع بالتربية غلط في غلط و ظلم واكبر ظلم انه بعد تعبج انج ما سويتي شيء
انصحج اتسوين ملف لج في البيت وانتى اتكافئين نفسج ترة الاعمال الممتازة200 الى كشتة البر ندفع فيها اكثر

سابعا : نحن شعب اغلبنا عيبنا نصرف الدينار اى بعدة دينار ثاني يمعي افلوس و سويلج مشروع بقالة مصبغة خياط المهم لى قام المشروع على حيلة طلقى الوزارة بالثلاث

والله يعينج ويعينه ويصبرنا على اخبال الوزارة

و ارجوا انج تقرين وتعلقين على موضوعي وزير ليوم واحد

و صدقيني الى صار في مصر وتونس رسالة حق كل ظالم انه ايامك معدودة

والسلام ختام

[أسماء30382]

ثامنا : لا تعتقدين ان الجنة خلف أسوار التربية فكل عمل له سلبيات وايجابيات

تاسعا : لا تجعلين العمل حياتك بل هو جزء من حياتك ادري الشغل نشيلة ويانا و مايخلص لي اليوم الثاني نظمي وقتج وقسمي الشغل واكيد راح يكون هناك وقت واعلم والكل يعلم اتمر ايام علينا نشتغل فيها 24 في 24

عاشرا : رغبي نفسك و حببي نفسك في عملك
قولى انا اعمل في مجتمع به اشياء جميلة وخير كثير تفائلي جدا جدا و توكلي على الله ربج يعينج ويفتح عليج وقولى يارب اتسخرلي عبيدك

و اخيرا : اقرأئي واحضري دورات لحل مشاكل تربوية ، لقانون الجذب ، لتطوير الذات ، للمشاكل الاسرية ، اصنعي النجاح

بدائرة تأثيرج و كوني متفائلة بالرغم من الحال الى احنا فيه فهذا حال المؤمن واختم حديثيه -حدثنا هداب بن خالد

الأزدي وشيبان بن فروخ جميعا عن سليمان بن المغيرة واللفظ لشيبان حدثنا سليمان حدثنا ثابت عن عبد الرحمن بن أبي

ليلى عن صهيب قال قال رسول الله صلى الله عليه وسلم عجبا لأمر المؤمن إن أمره كله خير وليس ذاك لأحد إلا للمؤمن إن

أصابته سراء شكر فكان خيرا له وإن أصابته ضراء صبر فكان خيرا له


صحيح الإمام مسلم