المشاكل اللي نواجهها في المدرسة

[الجرح أكثر شي يحبني]

السلااااااام عليييكم ...

اشرايكم نخلي في هذا الموضوع كل المشاكل اللي نواجهها في المدرسة سواء من الادارة أو من

الطلبة أو من زملاء العمل ( المعلمين- المعلمات-الاداريين )أو من التوجيه ..ونحاول نحلها لبعض..

وانا ببدي معاكم أول مشكلة..وتمنى تساعدوني..

في عندنا طالبة في المدرسة مشهوووورة جدا بالعناد والشطانة وعدم احترام المعلمة..مع انها

ذكية.. قلبي معورني عليها..مع اني ما ادرسها بس شدني شغبها ورحت حاولت أشوف ملفها

عند السكرتارية وبصراحة ما قصروا معاي..وشفت انها منتقلة من 4 مدارس مع انها توها في ثالثة

ابتدائي.. تخيلوا لدرجة حتى اذا اي معلمة صار عندها احتياط بصف البنت تين وتعصب..

المهم انا قمت اتقرب من البنت شوي شوي..وطبعا قبل ما اقعد معاها رحت عند الاخصائية وعرفت

حالتها..الاهل منفصلين والام ما تبيها تقول شيطانة ما اتحملها .. ومرت الابو تحبها بس حاطتلهم

قانون في البيت واذا سوت شي غلط تنحرم من الطلعة في الويك اند وغيره من أنواع الحرمان..

فمالها تنفيس الابالمدرسة..انا درت على معلماتها وعطيتهم كذا حل بس قالو مافاد معاها شي

ومن كثر الشكاو ي انقلوها من صفها وحطوها عندي .. وانا أبي اعرف اشلون اتعامل معاها من قبل

لاأشوفها واسيطر على سلوكها من بداية الفصل..فأتمنى تساعدوني .....:(311):

للأني بصراحة أبي اتحدى نفسي مع هالطالبة..وأتمنى اني اعدل ولو جزء بسيط من سلوكها....

[المعلمة المتميزة]

أ. الجرح أكثر شي يحبني
اولا : شكرااا لكـ على هذه الفكرهـ الحلوة ... اللي اتمنى من جميع الاعضاء التفاعل لاثراءها ... قولي أمين :)
ثانيا : بالنسبة للطالبهـ موقفج معاها في منتهى الانسانية """ وكثر الله من أمثالج ...
طرت علي فكره : وهي شرايج تسوين لها ملف خاص فيها ... وتحطين في كل شي يخصها من بيانات ، صورتها ، درجاتها ... والاهم من ذلك ... تسوين نفس اليوميات من الاحد الى الخميس بحيث يكون اتفاق بينج وبينها وتكلمنها بانها انسانهـ كبيره وتتحمل المسؤولية ...!!! يعني توضيح لها انج راح تابعينها من خلال معلماتها في كل حصة .... وتكبين كل شي تقوله المعلمة عنها ... في نهايهـ كل فتره... تسويلها تكريم يا في غرفة المديرهـ باجتماع يضم كل معلماتها ... أو في الطابور ... ويكون بتصويرها وشهادات تقدير ... أوسمهـ .... وهذه كل ماعندي وأن شاء الله أكون فدج وتقبلي تحياتي
http://forum.moalem.net/file/2010/02/22.gif (http://www.q8ow.com/up/)

[الجرح أكثر شي يحبني]

مشكوووووووورة حياااتي... صج إنج متميزة...والله اعجبتني الفكرة وببلش أرتب لها من اليوم ان شاء الله

واتمنى انها ستجيب معاي ...:(304):

[المعلمة المتميزة]

بالتوفيق .... وهذااا وما نصبو إليهأ
تحياتي لك http://forum.moalem.net/file/2010/02/23.gif (http://www.q8ow.com/up/)

[ابلة انجليزي]

يا حلوج يالجرح ويا حلو مواااضيعج........والله انج حطيتي ايدج على الجرح......
امـــــــــا انا مشكلتي غييير شكل........
ان ولله الحمد معروووفة بمدرستي اني من افضل المعلمات في مادتي وناظرتي او وكيلاتي ايموووتون علي.....بس المشكلة..... رئييسة قسمي.....وااااااااااااااى وااااي منها.....
مشكلتها ان عبالها رئيسة قسم يعني وكييلة وزااارة...واحنا عندها ولا شي....
والطاااامة الكبرى انها اتغااار مني ابشكل مو طبيعي واتحااااول تختلق مشااكل .... واذا شافت احد من بنات القسم ايساسرني او ايكلمني ابموضوووع خاااص....جرتها وحذرتها مني....مع ان والله ما صار بيني وبينها اي توتش..قاااعده احااول ابتعد عن المشاكل واهي الله يسامحها تدووور بين الاقسام وتقول اني اشيش القسم عليها....المشكلة ان كل الناس عارفينها..وايقولولي خليها اتولي ومالج شغل فيها...وااااااااااااااااي ....بغى يوووقف قلبها يوم درت اني نجحت بالاشراااف

قوووولولي شسوي معاها ...... ابي هالسنه اتعدي على خيييييير

[معلم]

والله بادرة حلوة منج اختي
اهم شي انج تكسبينها ... حاولي تتقربين منها وطبعاً اهي طفلة وبهالعمر الهدايا تلعب دور يعني كل ما حسيتي انها احرزت تقدم في المادة وسوت شي مفيد لازم تتكافأ وطبعاً التشجيع المعنوي والمادي راح يكون وايد مفيد معاها والله يوفقج

[الجرح أكثر شي يحبني]

تسلم يا أخ معلم .. طبعا أكيييد..لاتخاف مزهبتلها الهدايا من فانتسي وورلد من ألحين

[الجرح أكثر شي يحبني]

أبلة انجليزي..اولا حلا بدنيااااااج..من طيبج والله ..وانتي بعد ماعليج زود..وثانيا الله يعينج..اناحاسة فيج..بس يا اختي طول ما انج ماشية صح ماعليج من أحد..والحمد لله ان الناظرة والوكيلة وباقي المدرسات عارفينج..
شوفي انتي الحين ان شاءالله بتصيرين رئيسة قسم..وان شاء الله السنة الياية بتطلعين من المدرسة..فلج حلين اما انج تقعدين معاها وتواجهينها وتقولين لها اللي بخاطرج..أو انج تطنشينها وتحقرينها وتعدين هالسنة..أو تجتمعين معاها عند الناظرة وكل واحد يفتح قلبه..

بس أهم شي خلي احد يكون معاج .. عشان يصير شاهد..الناظرة أو الوكيلة..لان هالنوع من رئيسات الاقسام يخرعون وممكن تقول شي انتي ماقلتيه..فلازم يكون في شاهد موثوق فيه عند الطرفين..

وأي شي تسلمينه لها سواء اختبار او درجات لازم توقعينها على الاستلام..ولا ممكن تتصيد عليج أي شي..دايما خليج واعية وبالسيف سايد..كل شي بالورقة والقلم...

وتذكري بالأخير : لاتقذف الا الشجرة المثمرة ...

تخيلي مرة يالي ندب لمدرسة ثانية..رئيسة قسمي لما درت ينت..تخيلي ماقالتي الخبر..وكانت حامل وراحت المنطقة من الصبح عند مدير المنطقة وقالت له هذي المعلمة ماتطلع مني أبيها هي عامود قسمي ان راحت أنا أضيع..شوفي الفرق..والله ما انسالها هالموقف..أحبها وايد ..وماعرفت بالسالفة الا لما انلغى القرار..

[المعلمة المتميزة]

مساء الخير على الموجودين ...:)
بالنسبهـ لمشكلة < ابلة انجليزي > كثير من المعلمات يمروون فيها ...
وجهة نظر: اكسبيها بالطيب ... مادام آخر سنه معاها تحميلها الله يعوض خير ...
تقبلوا تحياتي :)
http://forum.moalem.net/file/2010/02/25.gif (http://www.q8ow.com/up/)

[ابلة انجليزي]

بعـــــــــــد عمري الجرح.....ولا كلامج ايبرد القلب....ولعلمج انا ما استنتجت انها اتغااار مني بس زميلااتي اهم اللي قاللولي .....اتخيلللي...!!!...
متميزة حبيبتي مشكوووورة على النصيييحة.....بس انا حاااولت اسايرها...تدرييين شنو فسرته..؟؟
فسرته انييي خاااايفه منها.....اتصدقيييين.....!!!!

[ألماس]

بالنسبة لمشكله الغالية " الجرح أكثر شي يحبني " فأنا أعتقد إنها بإذن الله بسيطة رغم تخوفج منها لأن لو نظرتي للموضوع من زاويه ثانية لوجدتي بالنهايه إن هذي طفلة يتيمة مشاعر و بحاجة أنها تكسب شخص يكون قدوة لها و انتي فيج الخير و البركة و أهم شي تقعدين مع البنت و لا تفتحين بالبدايه معها آي موضوع يخص شطانتها أو نشاطها الزايد بالأصح و عرفي شنو اللي تحبه و شنو اللي يضايقها .
و شنو أكثر حصة تحبها و شنو هوايتها و غيره من هالمعلومات عشان تكسبينها و خليج دائما مبتسمه معاها و صادقه لأن الأطفال بهالعمر يفهمون .
و إذا حسيتي انها توثق فيج ابتدي نبهيها على أخطائها و ان شطانتها راح تضرها و عطيها محفزات عشان تحب الحصص و تنتبه فيها و إذا صارت حصتج خليها تكون قائدة على مجموعتها و عطيها أهميه و شجعيها و اكسبيها تراها بحاجه لإنسان يحتويها..
الله يوفقج لأن آنا مريت الفصل اللي طافت بنفس مشكلتج بس آنا أصعب شوي لأن البنت الشيطانه عندي كانت بالصف الحادي عشر يعني مراهقه و كانت تتأخر عن الحصه و تسولف بالحصة و و و و . لغاية ماكسبتها بالكلام الحلو و المعامله الطيبة فصارت تنطرني كل يوم عند باب المدرسة عشان بس تقولي صباح الخير
و صدقيني الابتسامة مفتاح الدخول لكل القلوب.
أما الغالية أبلة انجليزي فمشكلتج مو غريبة على الكل لأن دائما الشخص الناجح محارب و نادرا ما تلاقين رئيسة قسم تحب معلماتها ..
هم هذي كسبيها بالكلام الطيب و ردي اساءتها دائما باحسان و حاولي يكون دائما كلامج مسموع يعني تجنبي المساسر دام هذا طبعها و دائما استشيريها في كل شي حتى لو ما كنتي بحاجة لرأيها عشان بس تبينين لها أنها مهمة بالنسبه لج و الله يوفقكم أجمعين

[الجرح أكثر شي يحبني]

تسلمين يا الالماس على هالكلام الطيب..ان شاء الله راح اسوي كل هذا

[ابلة انجليزي]

تسلمييين المااس على هالنصيحة

[ألماس]

الله يسلمكم أحباب قلبي ...
و لو احنا خوات ...

[الدكتور راشد]

البنت تبي أحد يحسسها بالأمن والأطمئنان والأستقرار
لماذا
لأنه ما أحسسته البنت في البيت بسبب الأنفصال الوالدين
واستخدمت أسلوب الحيل النفسية وتفرغ الطاقة عندها في المدرسة بالشغب انتقاما من الأم والأب

استخدمي معها اسلوب العلاج باللعب
والرجاء الرجوع إلى الإخصائية النفسية حتى تفيدك أكثر
وكذالك ينفع معها دراسة حالة
يكون دقيق مع البنت أو المسترشدة

وتري من فريق العمل الإرشاد بإكتشاف الحالات المعلم والمعلمة


أخوك الدكتور راشد
تخصص إرشاد نفسي تربوي

[الجرح أكثر شي يحبني]

شاكرتلك مرورك و نصايحك د.راشد..انا بعد هذا اللي فهمته من حالتها..في اول يوم دوام ( أمس ) انا رحت للبنت ولميتها وقلتلها: انا مستانسة وايد لانج بتصيرين بصفي مع بناتي..انصدمت..,قالتلي ابلة انتي تحبيني؟قلتلها اي احبج .. و التقيت فيها اليوم بأول حصة لها عندي..والحمدلله تجاوبت معاي بشكل ماتوقعته..وشجعتها وعطيتها هدية لانها جاوبت السؤال الاثرائي..وفي نهاية الدوام باستني قبل لاتطلع..

[المعلمة المتميزة]

متابعهـ ... تقبلوا تحياتي
http://forum.moalem.net/file/2010/02/55.gif (http://www.q8ow.com/up/)

[الدكتور راشد]

مشكووووووووورة أستاذة
والله أنتي تداوين أكثر من جرح لأنه صار في الماضي وها أنتي وجتي شخص مجروووووووووح ( البنت ) تطبيق علية الحروووووووووح وتداويها بكل عطف وحنان ولطف
يالله رب السموات والأرضين السبع يداوي جرحك وجرح كل مجرووح .

والله قلبي حزن وعيني دمعت على ضمتك لها وأنتي الأم البديلة ويكثر من أمثالك .
وتري من الصعب فهم النفس البشرية ياجرح

[الجرح أكثر شي يحبني]

آآآآآآآآآآآآآآآآآآآآمين يارب العالمين .... مشكوووور واااايد يادكتور راشد على تشجيعك ومساندتك لنا ....ياحلوها اليوم تريقت معاي :) وبالنسبة للحنان والعطف ..انا وايد احب اليهال واعاملهم مثل اعيالي واعيال خواني وخواتي..امشي وبوس فيهم والمهم ( تعودوا علي :) ) كل وحدة ناقصها حنان تيي وتلمني .. ياااحلوهم..ربي يصلحهم ويحفظهم لأهلهم...

أكرر لك شكري واحترامي لنصائحك

[همس الرووح]

هلا بالجميع بالنسبة للمشكلة الأولى

آنا مع الدكتور راشد والمعلمة المتميزة

فعلاً راح تكون النتيجة رائعة وللعلم آنا عندي

نفس المشكلة مع الصف الثالث الثانوي الأدبي

كلهن بنفس مستوى الشطانة الا خمس طالبات

فقط والحمد لله العام الماضي تخرجن وعملت معاهن

نفس المعلمة المتميزة فكانت الطريقة لها نتيجة هائلة


والموضوع يستحق الخمس نجوم ،،،،


******

[همس الرووح]

بالنسبة للمشكلة الثانية


ترى الصواعق لا تضرب الا القمم

شبعنا من حركات رئيسات الأقسام

واللي يشعرن بالنقص نتيجة تفوق معلماتهن عليهن

الطريقة كسبها عن طريق الطيبة والخلق الحسن

ومن ثم الهدايا لأنها قد ترى في الهدايا غرض آخر في نفسها

وبس هذا مالدي خالص التقدير للمعلمة الانجليزي

*****

[الجرح أكثر شي يحبني]

مشكوووورة يا همس الروح على كلماتج الحلوة .....وشاكرتلج مرورج ومشاركتج...دايما منورة